Türkmenistan we Gazagystan «Demirgazyk — Günorta» halkara ulag geçelgesiniň gündogar böleginiň mümkinçiliklerini öňe sürmek bilen gyzyklanýar.
Gazagystan Respublikasynyň Hökümetiniň metbugat gullugynyň habarynda, munuň Gazagystanyň premýer-ministriniň orunbasary Serik Žumangarin bilen Türkmenistanyň Ministrler Kabinetiniň ýanyndaky Ulag we kommunikasiýalar agentliginiň ýolbaşçysy Mämmethan Çakyýewiň duşuşygyndan soň yglan edilendigi aýdylýar.
Duşuşykda Turgundy — Hyrat demir ýolunyň gurluşygy we Hytaýyň ugry boýunça Turgundynyň üsti bilen harytlaryň iberilmegini işjeňleşdirmek mümkinçiligi ara alnyp maslahatlaşyldy.
Taraplar Hytaý — Gazagystan — Türkmenistan — Eýran hem-de Russiýa Federasiýasynyň, Türkmenistanyň we Gazagystanyň bu ugruň gündogar şahamçasynda ýük daşamak boýunça bitewi logistika operatoryny döretmek barada ylalaşygyna görä, «Demirgazyk — Günorta» ugry boýunça ähli bilelikdäki geçelgeler üçin bäsdeşlige ukyply nyrh şertlerini döretmek boýunça özara netijeli işleriň ähmiýetini bellediler.
Iki ýurt hem Gazagystandan we Türkmenistandan uzaýan geçelgäniň gündogar bölegini ösdürmekde işjeň hyzmatdaşlyk edýär, harytlaryň Pakistana we Hindistana geçmegini ýeňilleşdirýär.
2024-nji ýylyň iýulynda «Demirgazyk — Günorta» geçelgesiniň sinhron ösüşi üçin Gazagystanyň, Russiýanyň, Eýranyň we Türkmenistanyň arasynda ýol kartasyna gol çekilendigini ýatlap geçmek möhümdir. Şeýle hem Owganystanyň üsti bilen uzaýan demir ýollaryň günbatar şahamçasyny ulanmak kararyna gelindi.
«Demirgazyk — Günorta» halkara ulag geçelgesi — bu Sankt-Peterburgy Eýran we Hindistan portlary bilen birleşdirýän 7200 km uzynlykdaky multimodal ýol. Ol Sues kanalynyň üsti bilen Ýewropany Pars aýlagy we Hindi ummany ýurtlary bilen birikdirýän deňiz ýoluny çalşyp boljak mümkinçiligi hödürleýär.
Geçelgäniň günbatar we gündogar şahalary Eýrandan geçýär: günbatar şahasy Reştiň üsti bilen geçýän awtomobil ulaglaryndan peýdalansa, gündogar şahasy demirýol ulaglaryny ulanýar. Eýranda iň soňky barmaly nokat deňiz arkaly Hindistana ýük iberilip bilinjek Bandar Abbas portydyr. Ugruň günbatar şahasy Azerbaýjandan, gündogar şahasy Gazagystandan we Türkmenistandan geçýär.
