Gruziýa bilen Bolgariýanyň arasynda parom gatnawynyň açylmagy Orta geçelgäniň netijeliligi üçin möhümdir

14.07.2024

Bolgariýa Gara deňiz boýunça Gruziýa bilen parom aragatnaşygyny täzeden başlamak arkaly Orta geçelgäni ösdürmek boýunça nobatdaky ädimini ädýär. Bu barada Bolgariýanyň metbugatyna salgylanýan «Trend» habar berýär. «Bolgariýa demir ýollarynyň, Bolgariýanyň «P.N.A Ltd» deňiz kompaniýasynyň we Gruziýanyň demir ýollarynyň wekilleri Tbiliside Gara deňizde parom aragatnaşygyny dikeltmek barada şertnama baglaşdy» — diýlip, köpçülikleýin habar beriş serişdeleriniň maglumatlarynda aýdylýar. Gara deňizden daşalýan harytlaryň maddy-tehniki üpjünçiliginde Bolgariýa bilen Gruziýanyň arasyndaky parom we demir ýol aragatnaşyklary möhüm orny eýeleýär. Parom aragatnaşygynyň dikeldilmegi, Hazaryň üsti bilen uzaýan halkara ulag geçelgesiniň (Orta geçelge) netijeliligini ýokarlandyrmak nukdaýnazaryndan hem diýseň möhümdir. Bu barada Bolgariýa we Gruziýanyň hünärmenleriniň Tbiliside geçirilen maslahatynyň jemleri boýunça bellendi. Seneler soň kesgitlener. Orta geçelgäniň 10 ýyldan gowrak wagt bäri işleýändigini bellemek gerek, ýöne soňky iki ýylda täze geosyýasy hakykatlar sebäpli işjeňlik artdy. Onuň ugry boýunça 2023-nji ýylda 2,7 million tonna ýük geçdi (ösüş 86%), 2024-nji ýylda bolsa ýük akymy 4,2 million tonnadan hem geçip biler.