24-nji iýulda «Ýüpek ýoly — 2023» rallisinde Watanymyzyň ýaşyl tuguny belentde parladan sürüji türgenlerimiz ýurdumyza dolandylar.
Şan-şöhratly menziller
Ildeşlerimiz ralliden soňra, özleriniň kuwwatly awtoulagynda Russiýa Federasiýasyndan Gazagystan üsti bilen 3000 km gowrak ýoly geçip, Türkmenistan döwletimize geldiler. Babarap ýaşaýyş toplumynyň golaýynda sürüji türgenler uly hormat bilen garşylandy.
9 günüň dowamynda 5228 kilometre barabar menzili külterlän sürüjilerimiz Russiýa Federasiýasynyň 13 sebitini geçdiler. Bu abraýly ýaryşa dünýäniň 23 döwletinden 98 ekipaž (topar) gatnaşdy.
«Türkmenawtoulaglary» agentliginiň «Nissan Patrol» awtoulagynda bäsleşen doganlar Merdan we Şöhrat Toýlyýewler ýaryşyň T2 görnüşinden umumy hasapda ikinji orny eýelemegi başardylar.
Ýeri gelende aýtsak, «Türkmenawtoulaglary» agentliginiň sürüjisi Maksatmyrat Daňatarow we Türkmenistanyň Awtomobil sport federasiýasynyň sürüjisi Didar Orazmedow bu ralli ýaryşy üçünji orun bilen tamamlamagy başardylar.
