Türkmenistanyň Prezidenti Serdar Berdimuhamedow Gruziýanyň Premýer-ministri Irakliý Kobahidze bilen duşuşdy

09.03.2025

Türkmenistanyň Prezidenti Serdar Berdimuhamedow anna güni Aşgabatda Gruziýanyň Premýer-ministri Irakliý Kobahidzäni kabul etdi. Bu barada Türkmenistanyň resmi metbugaty habar berýär. Duşuşygyň barşynda taraplar dostlukly gatnaşyklary berkitmek, dürli ulgamlarda, hususan-da ulag we energetika pudaklarynda hyzmatdaşlygy giňeltmek meselelerini ara alyp maslahatlaşdylar. Serdar Berdimuhamedow we Irakliý Kobahidze ikitaraplaýyn syýasy we ykdysady gatnaşyklaryň oňyn ösüş depginini nygtap, Orta ulag geçelgesini ösdürmegiň wajyp ähmiýetini bellediler. Irakliý Kobahidze Merkezi Aziýada abadançylygy berkitmekde Türkmenistanyň goşýan goşandyny nygtady we şunuň bilen baglylykda Gruziýanyň Hökümetiniň alyp barýan parahatçylyk syýasaty barada gürrüň berdi. Giňişleýin düzümde geçirilen duşuşyga bolsa Türkmenistanyň we Gruziýanyň ýokary derejeli wekilleri gatnaşdylar. Gepleşikleriň jemleri boýunça birnäçe möhüm ylalaşyklara gol çekildi. Şolaryň hatarynda 2025 – 2026-njy ýyllarda Türkmenistanyň we Gruziýanyň daşary işler ministrlikleriniň arasynda hyzmatdaşlyk Maksatnamasy, Gümrük meseleleri babatda hyzmatdaşlyk etmek hakynda Ylalaşyk, Ösümlikleri goramak hakynda Ylalaşyk, Sport ulgamynda özara düşünişmek hakynda Ähtnama bar.