Türkmenistan we Türkiýe Orta Koridor boýunça ýük daşamalary ara alyp maslahatlaşýarlar

23.10.2024

Türkmenistanyň Ministrler Kabinetiniň ýanyndaky Ulag we Aragatnaşyk Agentliginiň Baş direktory Mämmethan Çakyýew 15-18-nji oktýabr aralygynda geçirilen Halkara Ýol Federasiýasynyň (IRF) Dünýä kongresine gatnaşmak üçin Türkiýä bardy. Forumyň çäklerinde Çakyýew Türkiýe Respublikasynyň Halkara Awtomobil Daşamaçylary Assosiasiýasynyň (UND) wekiliýeti bilen duşuşyk geçirdi diýip, ulag sektorynyň habarlar portaly Lojiyol habar berýär. Duşuşykda Ulag hyzmatlaryny düzgünleşdirmek boýunça Baş müdiri Murat Baştor, bölüm müdiri Hasan Boza, Stambulda Türkmenistanyň Baş konsuly Muhammetnur Owezow we Türkmenistanyň Ulag-logistika merkeziniň (TULM) wekili Orazmurat Hydaýew gatnaşdy. Gepleşiklerde Türkmenistanyň ulag ulgamynyň Hytaýdan Ýewropa we beýleki ugurlar boýunça Orta koridor arkaly çalt ösýän halkara awtomobil daşamalaryna gatnaşmagy meselesi ara alnyp maslahatlaşyldy. Çakyýew 2025-nji ýyla çenli Türkmenistanyň Ro-Pax deňiz flotuna Hazar deňzi arkaly yzygiderli hyzmat üçin aýratyn ähmiýetli iki gäminiň goşuljakdygyny aýtdy. Mundan başga-da, UND we TULM arasynda dowam edýän gepleşikleriň çäginde sürüjiler üçin wiza töleglerini azaltmak boýunça türkmen häkimiýetleri tarapyndan alnyp barylýan işler barada maglumat berildi. Çakyýew we Baştor iki ýurduň arasyndaky ulag pudagyndaky möhüm wakalar boýunça maslahatlaşdylar. Iki ýurduň ulag edaralary gümrük resmileşdirilmegi, Türkmenbaşy portuna baryp görmek we 2024-nji ýylda türk döwletleriniň çäginde elektron ýol resminamalaryny ulanmak ýaly meseleler boýunça ylalaşyk gazandylar.