Gazagystan Respublikasynyň Premýer-ministriniň orunbasary Serik Žumangarin degişli ministrlikleriň, «Gazagystanyň demir ýollarynyň» hem-de Respublikanyň Parlamentiniň Mejlisiniň deputaty Bolatbek Nažmetdinulynyň gatnaşmagynda ulaglarda ýük daşamak bilen bagly möhüm meseleler boýunça maslahat geçirdi.
Gazagystan Respublikasynyň Ulag ministrliginiň habaryna görä, 2023-nji ýylyň ahyrynda eksport-import aragatnaşyklarynda harytlary daşamagyň umumy möçberi 7,6 million tonna (2,8 million tonna – eksport, 4,8 million tonna – import) ýetdi. Şunuň bilen baglylykda, içerki ýük daşaýjylaryň paýy 50,2%, şol sanda Özbegistan – 10,6%, Türkiýe – 5,5%, Russiýa – 3%, Täjigistan – 2,5% boldy.
Ýewropa ýurtlary daşalýan ýükleriň 1,6 million tonnasyny eýeleýär. Bu görkezijiniň ýarysy gazak ýük daşaýjylaryna degişlidir (50%). Şol bir wagtyň özünde hem, döwletara söwda ugurlarynyň öňünde çynlakaý päsgelçilikler bolup, olar Polşada halkara ýol ulaglary üçin ähli barlag nokatlarynyň ýapylmagy we Russiýa bilen Belarusyň serhedinde diňe bir gözegçilik nokadynyň hereket etmegi bilen baglydyr.
Bar bolan halkara ugurlaryny çalşyp biljek çeşmeler hökmünde deputat B.Nažmetdinuly Türkmenistanyň üsti bilen Türkiýä we Pars aýlagynyň ýurtlaryna barýan ugra seretmegi teklip etdi. Munuň özi Türkmenistan bilen wiza amallaryny ýönekeýleşdirmekde döwletiň ýardamyny talap edýär. Mundan başga-da, Ýewropa Bileleşiginiň ýurtlaryna haryt ibermegiň çalşyp boljak çeşmeleri hökmünde Latwiýanyň üstünden uzaýan ugur boýunça işlemek hakyndaky teklip hödürlenildi.
Duşuşykdan soň Serik Žumangarin gatnaşyjylara ozalky ugurlaryň ornuny tutup biljek halkara ýol ugurlary üçin ähli nusgalary işläp düzmegi we işewür wekilleriň tekliplerini göz öňünde tutup, olary ösdürmek üçin ýol kartasyny taýýarlamagy tabşyrdy.
